سب سے اَولیٰ و اعلیٰ ہمَارا نبی ﷺ

سب سے اَولیٰ و اعلیٰ ہمَارا نبی ﷺ

سب سے بالا و وَالا ہمَارا نبی ﷺ

اپنے مولیٰ کا پیارا ہمَارا نبی ﷺ

دونوں عالَم کا دُولہا ہمَارا نبی ﷺ

بزمِ آخر کا شمع فَروزاں ہوا

نُورِ اوّل کا جلوہ ہمَارا نبی ﷺ

جس کو شایاں ہے عرشِ خدا پر جلوس

ہے وہ سلطانِ والا ہمَارا نبی ﷺ

بُجھ گئیں جس کے آگے سبھی مشعلیں

شمع وہ لے کر آیا ہمَارا نبی ﷺ

جس کے تلووں کا دھووَن ہے آبِ حیات

ہے وہ جانِ مسیحا ہمَارا نبی ﷺ

عرش و کرسی کی تھیں آئینہ بندیاں

سُوئے حق جب سدھارا ہمَارا نبی ﷺ

خلق سے اَولیا اَولیا سے رُسل

اور رَسولوں سے اَعلیٰ ہمَارا نبی ﷺ

حسن کھاتا ہے جس کے نمک کی قسم

وہ مَلیحِ دِل آرا ہمَارا نبی ﷺ

ذِکر سب پھیکے جب تک نہ مذکور ہو

نمکین حسن والا ہمَارا نبیﷺ

جس کی دو بُوند ہیں کوثر و سلسبیل

ہے وہ رحمت کا دریا ہمَارا نبی ﷺ

جیسے سب کا خدا ایک ہے ویسے ہی

ان کا اُن کا تمہارا ہمَارا نبی ﷺ

قرنوں بدلی رَسولوں کی ہوتی رہی

چاند بدلی کا نکلا ہمَارا نبی ﷺ

کون دیتا ہے دینے کو منھ چاہیے

دینے والا ہے سچا ہمَارا نبی ﷺ

کیا خبر کتنے تارے کِھلے چھپ گئے

پر نہ ڈُوبے نہ ڈُوبا ہمارا نبی ﷺ

مُلکِ کونین میں اَنبیا تاجدار

تاجداروں کا آقا ہمَارا نبی ﷺ

لامکاں تک اُجالا ہے جس کا وہ ہے

ہر مکاں کا اُجالا ہمَارا نبیﷺ

سارے اچھّوں میں اچھّا سَمَجھیے جسے

ہے اُس اچھّے سے اچھّا ہمَارا نبی ﷺ

سارے اُونچوں میں اُونچا سمجھیے جسے

ہے اُس اُونچے سے اُونچا ہمَارا نبی ﷺ

انبیا سے کروں عرض کیوں مالکو!

کیا نبی ہے تمہارا ہمَارا نبی ﷺ

جس نے ٹکڑے کیے ہیں قمر کے وہ ہے

نُورِ وَحدت کا ٹکڑا ہمَارا نبی ﷺ

سب چمک والے اُجلوں میں چمکا کیے

اندھے شیشوں میں چمکا ہمَارا نبی ﷺ

جس نے مُردہ دِلوں کو دی عمر اَبد

ہے وہ جانِ مسیحا ہمَارا نبی ﷺ

غمزدوں کو ✍️ رضاؔ مژدہ دیجے کہ ہے

بیکسوں کا سہَارا ہمَارا نبی ﷺ

الصلوةوالسلام علیک یارسول اللہ

وعلیٰ الک واصحابک یاحبیب اللہ