#منقبت_مولا_علی
یا علی المرتضٰے مولیٰ علی مشکل کشاء
آپ ہیں شیرِ خدا مولی علی مشکل کشاء
صاحبِ لُطف و عطا مولیٰ علی مشکل کُشاء
ہیں شہیدِ با وفا مولیٰ علی مشکل کُشاء
میں گناہوں کا مریض اور آپ ہیں میرے طبیب
دیجئے مجھ کو شِفا مولیٰ علی مشکل کُشاء
جان کو خطرہ ہے میری دشمنوں سے ہر گھڑی
المدد شیرِ خدا مولیٰ علی مشکل کُشاء
حیدرِکرّار! لے کے آوَ تیغِ ذُوالفقار
زورِ دشمن بڑھ چلا مولیٰ علی مشکل کُشاء
مغفِرت کروایئے جنَّت میں لے کے جایئے
واسِطہ حَسَنَین کا مولیٰ علی مشکل کُشاء
دل سے دنیا کی محبَّت دُور کر کے یا علی!
دیدو عشقِ مصطَفٰے ﷺ مولیٰ علی مشکل کُشاء
یا علی! بہرِ نبی ﷺ ہم کو نَجف بُلوایئے
ہو کرم یا مُرتضیٰ مولیٰ علی مشکل کُشاء
شبّر و شبّیر کے بابا مجھے دیدار ہو
خواب میں اب آپ کا مولیٰ علی مشکل کُشاء
اشکبار آنکھیں عطا ہوں دل کی سختی دُور ہو
دیجئے خوفِ خدا مولیٰ علی مشکل کُشاء
ایک ذرّہ اپنی اُلفت کا عنایت کر مجھے
اپنا دیوانہ بنا مولیٰ علی مشکل کُشاء
بھیک لینے کیلئے دربار میں منگتا تیرا
لے کے کشکول آ گیا مولیٰ علی مشکل کُشاء
کیوں پِھروں در در بھلا خیرات لینے کے لئے
میں فقط منگتا تیرا مولیٰ علی مشکل کُشاء
نفسِ اَمّارہ ہو مغلوب اور سدا ناکام ہو
وار ہر شیطان کا مولیٰ علی مشکل کُشاء
بے سبب بخشش ہو میری یہ دعا فرمایئے
مُصطَفٰیٰ ﷺ کا واسِطہ مولیٰ علی مشکل کُشاء
کیجئے حق سے دعا ایمان پر ہو خاتِمہ
خیر سے عطّارؔ کا مولیٰ علی مشکل کُشاء